Stafræn umsókn fyrir sölu á íbúðarhúsnæði í Grindavík
Hamfarirnar í Grindavík hafa alið af sér fjöldann allan af áskorunum og verkefnum þeim tengdum. Eitt þeirra verkefna datt inn á borð hjá okkur en í samstarfi við Stafrænt Ísland og Fasteignafélagið Þórkötlu unnum við stafrænt umsóknarkerfi fyrir sölu á íbúðarhúsnæði í Grindavík. Verðugt verkefni sem við erum virkilega stolt að hafa verið treyst fyrir.
Ráðgjöf
Hönnun
Forritun
UX
Kröfur og þarfir vakna upp af margvíslegum ástæðum, mis-alvarlegum eins og gefur að skilja, en stundum þarf að bregðast hratt og örugglega við aðstæðum sem erfitt er að eiga við. Eldgosið í Grindavík er þar gott dæmi, sjaldan erum við jafn hjálparvana og þegar náttúran tekur af okkur völdin. Frumvarp varðandi kaup ríkissjóðs á íbúðarhúsnæði Grindvíkinga var enn í vinnslu þegar við hófumst handa við að teikna upp mögulega ferla út frá upplýsingum sem lágu fyrir á þeim tímapunkti. Um leið og frumvarpið var samþykkt hófum við handa við forritun verkefnisins.
Það er svo magnað að þegar allir eru af vilja gerðir og forgangsraða verkefnum í takt þá gerast hlutirnir. Stafrænt umsóknarkerfi fyrir Fasteignafélagið Þórkötlu var klárað á alveg ótrúlega skömmum tíma miðað við þær tengingar og tæknilegu áskoranir sem hverri umsókn fylgir. Í kjölfarið unnum við umbætur á kerfinu með það markmið að auka gæði þjónustu við vinnslu umsókna en fleiri hundruð umsóknir hafa nú verið sendar inn.
